Greiðslukerfi landsins lá niðri í hálftíma – þjóðin upplifði í fyrsta sinn í áratugi að ekkert væri dregið af henni

Truflun í reglubundnu viðhaldi hjá Reiknistofu bankanna olli því í gær að greiðslur hættu að berast á milli reikninga í um það bil hálfa klukkustund. Á meðan stóðu landsmenn frammi fyrir óþekktu ástandi: peningarnir þeirra lágu kyrrir og enginn tók neitt af þeim.

„Þetta var mjög óþægilegt fyrir alla,“ segir talsmaður Reiknistofunnar. „Við fengum símtöl frá fólki sem hélt að eitthvað alvarlegt hefði gerst, af því að staðan á reikningnum hjá því hafði ekki lækkað í tuttugu mínútur.“

Bankarnir báðu viðskiptavini sína að endurtaka ekki greiðslur á meðan bilunin stóð yfir. Halldór, 63 ára, las tilkynninguna of seint. „Ég ýtti bara aftur og aftur á „greiða“,“ segir hann. „Ég hélt að kerfið væri að prófa hvort ég meinti þetta.“ Halldór á nú inneign hjá orkufyrirtækinu sínu til ársins 2031 og hefur fengið kort frá fyrirtækinu þar sem honum er þakkað fyrir tryggðina.

Sálfræðingar segja að margir hafi fundið fyrir svonefndum "vaxtafráhvörfum". „Fólk er svo vant því að eitthvað sé alltaf að gerast í bakgrunni, verðbætur, gjöld og áskriftir, að þögnin verður yfirþyrmandi,“ segir sálfræðingur sem sérhæfir sig í fjármálaáföllum.

Klukkan tvö var kerfið komið í lag og öll dráttargjöld, þjónustugjöld og færslugjöld sem söfnuðust upp á meðan voru innheimt í einu lagi. Talsmaður eins bankans segir að viðskiptavinir hafi sýnt mikinn létti.

Reiknistofan hefur lofað að sambærilegt muni ekki gerast aftur. Bankarnir hafa jafnframt kannað hvort hægt sé að innheimta sérstakt truflunargjald vegna þeirra þrjátíu mínútna sem fólk fékk að vera í friði.