Maður sem fór á Læknavaktina með kvef náði sér á biðstofunni

Karlmaður á fertugsaldri sem leitaði á Læknavaktina á þriðjudagskvöld vegna kvefs var útskrifaður af biðstofunni fjórum klukkustundum og tuttugu mínútum síðar, án þess að hafa hitt lækni. Hann var þá orðinn einkennalaus.

„Ég kom inn með hálsbólgu og nefrennsli,“ segir Kristján (34). „Þegar númerið mitt var loks kallað upp var ég orðinn góður. Ég var reyndar kominn með bakverk af stólunum, svo ég tók nýtt númer.“

Að sögn starfsmanns Læknavaktarinnar er þetta algengara en margan grunar. „Við köllum þetta biðstofumeðferðina,“ segir hann. „Hún virkar í um 60 prósentum tilfella. Hún hefur ekki verið prófuð til fulls á hinum 40 prósentunum, því þau eru enn að bíða.“

Á biðstofunni hefur myndast sérstakt samfélag. Fastagestir þekkjast orðið og á fimmtudagskvöldum er boðið upp á prjónahring. Tvö pör hafa kynnst á biðstofunni á árinu og annað þeirra á von á barni. Þau vonast til að komast að hjá lækni fyrir fæðinguna.

Heilbrigðisyfirvöld segjast meðvituð um vandann og hafa brugðist við með því að setja upp skjá sem sýnir áætlaðan biðtíma. Skjárinn sýnir alltaf „1–2 klst.“, sem samkvæmt heimildum Mysunnar er meðalbiðtíminn árið 2009.

Einnig er væntanlegt nýtt smáforrit þar sem fólk getur tekið númer að heiman. Prófanir hafa gengið vel, en biðtími eftir aðgangi að forritinu er nú um þrjár vikur.

Fólki sem ekki er í bráðri hættu er þó áfram bent á að hringja í 1700. Þar er fólk sett í biðröð.