Kvikan undir Svartsengi aldrei meiri – gos væntanlegt „á næstu dögum“, eins og síðustu átta mánuði

Kvikusöfnun undir Svartsengi hefur staðið yfir mánuðum saman og rúmmálið er orðið meira en nokkru sinni frá því að goshrinan hófst. Samkvæmt nýjustu tilkynningu eru „auknar líkur á eldgosi á næstu dögum eða vikum“. Sama orðalag hefur verið notað í hverri viku síðan í mars.

„Þetta er eins og að bíða eftir strætó sem hefur verið „á leiðinni“ síðan í vor,“ segir íbúi á Reykjanesskaga. „Nema strætóinn er úr 1.200 gráðu heitu bergi.“

Jarðfræðingar eru klofnir í afstöðu sinni. Einn hópur telur að gos hefjist innan fárra daga. Annar telur að kvikan sé hætt að koma upp og muni leita annað. Þriðji hópurinn, sem er sá stærsti, telur að báðir hinir hafi rangt fyrir sér, án þess að vilja segja hvað gerist í staðinn.

„Við getum fullyrt að það mun gjósa,“ segir jarðeðlisfræðingur sem ræddi við Mysuna. „Eða ekki. Á Reykjanesskaga. Eða mögulega annars staðar. Á þessu ári eða því næsta, eða á næstu öldum. Vísindin eru mjög skýr hvað þetta varðar.“

Ágreiningurinn hefur nú borist inn á kaffistofurnar. Í Öskju, náttúrufræðahúsi Háskólans, varð heitt í kolunum á miðvikudag þegar tveir prófessorar deildu um túlkun GPS-gagna. Annar benti á að land hefði risið um 30 sentímetra. Hinn benti á að hann hefði sjálfur risið úr sæti sínu og það þýddi ekki að hann væri að fara að gjósa.

Ferðaþjónustan bíður einnig spennt. Rútufyrirtæki hafa selt yfir fjögur þúsund miða í „gosferðir“ sem gilda „þegar gýs“, og sumir ferðamenn sem keyptu miða í apríl eru enn á hóteli í Keflavík. „Ég er búinn að vera hér í sjö mánuði,“ segir þýskur ferðamaður. „Ég er farinn að tala íslensku. Ég sagði „þetta reddast“ við mann í gær og hann tók utan um mig.“

Veðurstofan hefur brugðist við og hyggst héðan í frá gefa út sameiginlega spá um veður og eldgos. Fyrsta spáin hljóðar svo: „Skúrir, strekkingur og hugsanlega kvikuhlaup.“