Áhrifavaldur fer í stafræna föstu – birtir 340 færslur um hana

Áhrifavaldurinn Embla Ýr (28), sem er með 47 þúsund fylgjendur á Instagram, tilkynnti í gær að hún hygðist taka sér algjört hlé frá samfélagsmiðlum „til að finna sjálfa sig aftur“.

Tilkynningin var birt í formi fjórtán mínútna myndbands, þriggja hringekjufærslna og samstarfs við íslenskt jurtatefyrirtæki (afsláttarkóði: EMBLAFRÍ).

Síðan hefur hún birt daglegar uppfærslur um hvernig hléið gangi. „Dagur 4. Ég finn að ég er orðin miklu meira til staðar,“ skrifaði hún við mynd af sér í lopapeysu að horfa íhugul út á Faxaflóa. Myndin var tekin 38 sinnum.

Vinkonur Emblu segja hana hafa breyst mikið. „Hún horfir á okkur núna þegar við tölum við hana,“ segir ein þeirra. „Reyndar mest til að athuga hvort við séum að taka upp, en það er samt framför.“

Embla hefur einnig hleypt af stokkunum hlaðvarpinu Án síma, þar sem hún ræðir við aðra áhrifavalda um mikilvægi þess að vera ekki á samfélagsmiðlum. Fyrsti þátturinn fór beint í efsta sæti á Spotify í flokknum „Heilsa og vellíðan – Ísland“, þar sem keppinautarnir eru tveir.

Að sögn umboðsmanns Emblu mun hléið standa „eins lengi og þörf krefur, eða þar til samningurinn við jurtateið rennur út í lok mánaðarins“.