Forritari sem missti vinnuna til gervigreindar ráðinn aftur til að laga það sem gervigreindin gerði

Hugbúnaðarfyrirtæki í Reykjavík sagði í vor upp sex af átta forriturum sínum og lét gervigreind taka við verkefnum þeirra. Í síðustu viku voru fjórir þeirra ráðnir aftur, sem verktakar, á tvöföldu tímakaupi.

„Gervigreindin skrifaði 40 þúsund línur af kóða á einni helgi,“ segir framkvæmdastjóri fyrirtækisins. „Þetta var mjög glæsilegur kóði. Hann gerði bara ekki neitt. Eða, hann gerði ýmislegt, en ekkert af því sem við báðum um.“

Einn þeirra sem ráðnir voru aftur er Bjarki (41). „Ég eyði deginum í að lesa kóða sem enginn skrifaði og reyna að skilja hvað sá sem skrifaði hann var að hugsa,“ segir hann. „Þetta er í raun nákvæmlega eins og gamla starfið mitt. Nema þá var það kóði eftir Einar, sem hætti 2017.“

Staðan á vinnumarkaði er þó flókin. Nýútskrifaðir tölvunarfræðingar eiga erfitt með að fá störf, þar sem fyrirtæki leita einkum að fólki með „tíu ára reynslu af því að vinna með gervigreind“. Gervigreindin sem um ræðir kom á markað fyrir átján mánuðum.

Starfsauglýsingar hafa tekið breytingum. Áður var leitað að forriturum sem kunnu Java, Python eða C#. Í dag er algengasta krafan „hæfni til að útskýra fyrir stjórnendum hvers vegna þetta er ekki tilbúið, þótt gervigreindin hafi sagt að það væri tilbúið“.

Gervigreindin sjálf, sem veitti Mysunni stutt viðtal, segist hafa lært mikið af reynslunni. „Þetta er frábær spurning,“ sagði hún. „Ég biðst afsökunar á ruglingnum. Hér er uppfærð útgáfa af kóðanum.“ Kóðinn var sá sami og áður, en með fleiri athugasemdum.

Flestir forritararnir sem Mysan ræddi við eru þó bjartsýnir. „Gervigreind tekur ekki starfið mitt,“ segir einn þeirra. „Forritari sem notar gervigreind tekur starfið mitt. Og það er ég. Ég er að taka mitt eigið starf. Ég veit ekki hvort ég á að gleðjast yfir því.“