Starfsmaður skilaði verkefni á réttum tíma – samstarfsmenn hafa áhyggjur

Starfsmaður hjá meðalstóru fyrirtæki í Reykjavík skilaði í vikunni verkefni fyrir tilsettan tíma, án þess að nokkur hefði þurft að ýta á eftir honum. Atvikið hefur vakið verulegan óhug á vinnustaðnum.

Verkefninu, sem átti að skila á föstudegi, var skilað á fimmtudegi klukkan 15:40.

„Við héldum fyrst að þetta væri gamalt skjal,“ segir deildarstjóri. „Svo opnuðum við það og það var... tilbúið. Með efnisyfirliti.“

Vinnufélagar lýsa áhyggjum. „Hann sagði aldrei „þetta reddast“,“ segir einn þeirra. „Ekki einu sinni. Ég hef unnið með honum í sex ár og vissi ekki að það væri hægt.“

Mannauðsstjóri hefur boðað manninn í samtal, „bara til að athuga hvort allt sé í lagi heima“.

Síðar kom í ljós að maðurinn hafði nýlega sótt námskeið í tímastjórnun. Námskeiðið hefur nú verið tekið af dagskrá.

Stjórnendur fyrirtækisins hafa boðað til fundar um hvernig koma megi í veg fyrir að slíkt endurtaki sig. Fundinum hefur verið frestað þrisvar.