Bláa lónið skráð á markað – kvikusöfnun undir Svartsengi færð í útboðslýsingu sem „ónýttur vaxtarmöguleiki“

Bláa lónið hóf í vikunni hlutafjárútboð og vekur útboðslýsingin athygli fyrir djarfa framsetningu á jarðfræði Reykjanesskaga. Þar er landris við Svartsengi sýnt á línuriti undir fyrirsögninni „Stöðugur vöxtur“ en í örsmárri merkingu má sjá að línan er mæld í millimetrum.

„Við lítum ekki á eldsumbrot sem áhættu heldur sem náttúrulega birgðasöfnun,“ segir talsmaður félagsins. „Fá fyrirtæki geta státað af því að grunnurinn undir þeim sé í virkri stækkun.“

Í lýsingunni er einnig kafli um arðgreiðslustefnu, þar sem fram kemur að félagið hyggist greiða hluthöfum í hrauni ef reksturinn stöðvast. Hraunið verði afhent á staðnum og sé enn heitt.

Greinendur hafa reiknað út að virði félagsins sé langt yfir útboðsgenginu. Einn þeirra, sem ekki vill láta nafns síns getið, segist hafa notað hefðbundin líkön en sleppt dálkinum „náttúruvá“. „Hann skekkti allar niðurstöðurnar,“ útskýrir hann.

Gunnar, 41 árs verðbréfasafnari úr Garðabæ, keypti strax. „Ég hugsaði með mér: hversu oft fær maður að eiga hlut í einhverju sem hefur lokað sex sinnum vegna eldgoss og stendur enn?“ segir hann. „Þetta er seigla. Og heitt vatn.“

Lífeyrissjóðir hafa sýnt útboðinu áhuga. Talsmaður eins þeirra segir sjóðinn hafa farið vandlega yfir hættumatskort Veðurstofunnar og ákveðið að líta á það sem markaðskort.

Útboðinu lýkur á föstudag. Hlutabréfin verða afhent rafrænt eða, ef aðstæður breytast skyndilega, með þyrlu.