Grunnskólanemar fá tölustafi í stað bókstafanna sem komu í stað tölustafa

Menntamálaráðuneytið hefur kynnt áform um að einkunnir við lok grunnskóla verði framvegis gefnar í tölustöfum í stað bókstafa. Bókstafirnir voru teknir upp fyrir um áratug, í stað tölustafa.

„Við höfum farið vandlega yfir málið og komist að þeirri niðurstöðu að gamla kerfið hafi verið betra,“ segir talsmaður ráðuneytisins. „Það er að segja kerfið á undan kerfinu á undan þessu. Ekki það sem var á undan því.“

Kennarar hafa tekið tíðindunum með stóískri ró. „Ég hef kennt í 28 ár,“ segir umsjónarkennari í Hafnarfirði. „Ég hef gefið einkunnir í tölum, bókstöfum, hæfniviðmiðum, litum og einu sinni, árið 2019, í broskörlum. Ég á tölustafina enn einhvers staðar ofan í skúffu. Ég vissi að þeir kæmu aftur.“

Foreldrar eru ekki allir sannfærðir. „Ég var loksins búin að átta mig á muninum á B+ og B,“ segir móðir í Grafarholti. „Það tók mig sex ár. Nú á ég að skilja aftur hvað 7,5 þýðir. Ég veit ekki hvort ég hef orkuna.“

Nemendur eru hins vegar flestir sáttir. Í könnun meðal tíundu bekkinga sögðust 84 prósent ekki vita hvaða kerfi væri í gildi og 16 prósent spurðu hvort þetta hefði áhrif á TikTok.

Sérfræðingar í menntamálum hafa bent á að breytingar á einkunnakerfi hafi takmörkuð áhrif á lesskilning. Ráðuneytið hefur brugðist við þessum ábendingum og boðar nú nýjan mælikvarða á lesskilning. Hann verður í bókstöfum.

Samkvæmt áætlun ráðuneytisins verður kerfið endurskoðað á ný árið 2036. Heimildir Mysunnar herma að þá komi til greina að taka upp bókstafi.