Fasteignafélag ríkisins kynnir áætlun um gerð áætlunar um endurkaup Grindvíkinga

Fasteignafélag ríkisins, sem keypti stærstan hluta íbúðarhúsnæðis í Grindavík, kynnti í gær áætlun um gerð áætlunar um hvenær og hvernig fyrrverandi eigendur geti keypt húsin sín til baka. Gert er ráð fyrir að áætlunin sjálf liggi fyrir þegar vinnu við áætlunina um hana er lokið.

„Við skiljum vel að fólk vilji fá skýr svör,“ segir talsmaður félagsins. „Þess vegna höfum við skipað starfshóp sem mun skila tillögum um hvernig best sé að skipa annan starfshóp.“

Ásdís (46) og fjölskylda hennar bjuggu í sama húsinu við Víkurbraut í átján ár. Í dag búa þau í þriðja leiguhúsnæðinu á tveimur árum. „Ég sendi fyrirspurn um hvenær við gætum keypt húsið aftur,“ segir Ásdís. „Ég fékk sjálfvirkt svar um að erindið væri móttekið. Það var í fyrra. Síðan hef ég fengið þrjú sjálfvirk svör í viðbót um að það sé enn móttekið.“

Samkvæmt upplýsingum Mysunnar fá fyrri eigendur forkaupsrétt að húsum sínum. Ekki liggur fyrir á hvaða verði, hvenær, með hvaða skilyrðum eða hvort húsið verði enn á sínum stað. Að öðru leyti er málið í föstum skorðum.

Ríkið hefur á meðan séð um viðhald húsanna. Í því felst einkum að ganga úr skugga um að þau séu þarna enn. Það er gert ársfjórðungslega.

Margir Grindvíkingar hafa misst þolinmæðina og tekið til eigin ráða. Hópur íbúa fer nú vikulega í skoðunarferðir um eigin hús, gengur um herbergin með fasteignasala ríkisins og spyr hvort ekki sé hægt að gera þeim gott tilboð. „Hann sagði að eignin væri mjög spennandi,“ segir einn þeirra. „Mikill karakter. Útsýni yfir sprungu.“

Talsmaður félagsins hvetur Grindvíkinga til að sýna biðlund. „Fólk hefur sýnt ótrúlegt æðruleysi og við ætlum ekki að bregðast því trausti,“ segir hann. „Við ætlum að halda áfram að reyna á það.“