Jón greiddi af láninu í 22 ár – skuldar nú tvöfalt meira og fær viðurkenningu frá bankanum

Jón (58) úr Hafnarfirði tók 20 milljóna króna verðtryggt lán árið 2004 til að kaupa raðhús í Setberginu. Síðan hefur hann greitt af því hver einustu mánaðamót, alls 264 sinnum, án þess að missa úr eina einustu greiðslu.

Í dag stendur lánið í 41 milljón króna.

„Ég hélt fyrst að þetta væri villa,“ segir Jón. „Svo hringdi ég í bankann og þjónustufulltrúinn óskaði mér til hamingju. Hún sagði að þetta væri einhver besti árangur sem hún hefði séð.“

Í síðustu viku barst Jóni bréf frá bankanum, prentað á þykkan pappír með gylltum stöfum. Þar var honum tilkynnt að hann hefði verið tekinn inn í Platínuhóp bankans, sem er ætlaður viðskiptavinum sem hafa „vaxið með láninu sínu“. Bréfinu fylgdi boð á hátíðarkvöldverð. Jón greiðir sjálfur fyrir matinn, en upphæðin bætist við höfuðstólinn.

Upplýsingafulltrúi bankans segir mál Jóns sýna styrk íslenska lánakerfisins. „Verðtryggingin gerir nákvæmlega það sem nafnið segir. Hún tryggir,“ segir hann. „Spurningin hefur bara aldrei verið hvern.“

Samkvæmt greiðsluáætlun bankans innir Jón af hendi síðustu greiðsluna árið 2044, þá 76 ára gamall. Eftirstöðvar verða þá 63 milljónir. Bankinn hefur lagt til að lánið gangi í arf til barna Jóns, sem hafa ekki verið spurð.

Hagfræðingur sem Mysan ræddi við segir mikilvægt að horfa á heildarmyndina. „Ef Jón hefði ekkert greitt hefði lánið hækkað enn meira. Í raun hefur hann því sparað heilmikið.“ Hann gat ekki útskýrt hvar sá sparnaður væri geymdur.

Jón tekur stöðunni af æðruleysi. „Konan mín segir stundum að lánið sé þriðji aðilinn í hjónabandinu,“ segir hann. „Hún hefur rétt fyrir sér. Það fær stærri hluta af laununum mínum en hún.“ Jón hefur nú óskað eftir því að lánið verði skráð sem nánasti aðstandandi.